Ինչպե՞ս պետք է սնվեն հղի հանայք. news.am

Գաղտնիք չէ, որ հղի կանայք հավելյալ սնուցման կարիք ունեն: Սակայն դա բոլորովին չի նշանակում, թե հարկավոր է կրկնակի ծավալով սնունդ ընդունել:

Հղիության երկրորդ եւ երրորդ եռամսյակի ընթացքում օրական անհրաժեշտ հավելյալ սնուցիչների էներգետիկական արժեքը շուրջ 300 կալորիա է կազմում, հաղորդում է Medical Observer-ը:

Այդուհանդերձ, յուրաքանչյուր հղի կնոջ մոտ, սնուցիչների բաղադրության տեսանկյունից, տարբեր պահանջմունքներ կարող են ի հայտ գալ: Այնպես որ, ցանկալի է բժշկի կամ սննդաբանի հետ խորհրդակցել՝ ձեր կարիքներին անհրաժեշտ սննդակարգի լավագույն պլանն ընտրելու համար:

Ստորեւ մի շարք սնուցիչներ ենք ներկայացնում, որոնք առավել կարեւորություն ունեն հղի կանանց համար: Դրանց պարունակությամբ աչքի ընկնող սննդամթերքի որեւէ տեսակի սպառման չափաբաժնի մի փոքր ավելացում նախաձեռնելով՝ կարող եք հղիությամբ պայմանավորված հավելյալ կարիքների բավարարման հասնել:

Նախ՝ կալորիաների մասին. ինչպես արդեն նշվել է, հղի կանայք հղիության երկրորդ եւ երրորդ եռամսյակի ընթացքում օրական 300 կալորիայով բարձր էներգետիկական արժեք ունեցող սննդամթերքի կարիք են զգում: Հիշյալ պակասը կարող եք մեկ բաժակ յոգուրտի (110 կալորիա), մեկ շերտ հնդկացորենի հացի (70 կալորիա), խաշած կարտոֆիլի (120 կալորիա) կամ մեկ բաժակ ցածր յուղայնության կաթի (120 կալորիա) հաշվին լրացնել: Զերծ մնացեք դատարկ կալորիաներով սննդամթերքի տեսակներից (փքաբլիթ, ֆրի, հավի թեւիկ, են), որոնք, էներգետիկական արժեք չունենալուց բացի, կարող են նաեւ առողջությանը վնաս պատճառել: 

Վիտամին E. օրական անհրաժեշտ ծավալը՝ 12 մգ, կարող եք մեծ չափեր ունեցող մեկ ձվից ստանալ։

Վիտամին C. օրական անհրաժեշտ ծավալը՝ 10 մգ, կես բաժակ եփված ցուկկինին կարող է տրամարդել։

Վիտամին B₂. (ռիբոֆլավին). այս վիտամինի օրական 0.6 մգ չափով հավելյալ սնուցումը պտղին ի ծնե բնութագրվող, մասնավորապես՝ սրտի արատներից զերծ պահելու հրաշալի հնարավորություն է ընձեռում: Անհրաժեշտ չափաբաժինը վարսակի շիլայից կարող եք ստանալ:

Վիտամին B₁₂. օրական 0.2 մգ-ի չափով հավելյալ վիտամին B₁₂ ընդունելու պարագայում երեխայի նյարդային համակարգի նորմալ զարգացումը կապահովեք: Անհրաժեշտ չափաբաժինը 100 գրամ հավի մսի մեջ կարող եք գտնել:

Ֆոլաթթու. այս վիտամինը չափազանց անհրաժեշտ է հղի կանանց համար, քանի որ պտղին ի ծնե բնութագրվող բազմաթիվ արատներից, մասնավորապես՝ երկատված ողնաշարի զարգացումից կարող է զերծ պահել: Բժիշկներից շատերը խորհուրդ են տալիս նույնիսկ նախքան հղիությունը՝ մի քանի ամիսերի ընթացքում ֆոլաթթու ընդունել, ինչը վարսակի շիլայի, սպանախի, չոր լոբու, ոլոռի եւ արեւածաղի սերմերի մեջ կարելի է գտնել:

Մագնեզիում. հղի կնոջ օրական սննդակարգը 205 մգ մագնեզիում պետք է ներառի: Միներալի հարուստ պաշարներ խնձորի, կիտրոնի, թուրինջի, եգիպտացորենի, ընդեղենի եւ մուգ կանաչ բանջարեղենների մեջ կարելի է գտնել:

Ցինկ. ցինկի պահանջը հղիության փուլից է կախված: Առաջին եռամսյակի ընթացքում այն օրական 5,1 գրամ է կազմում, երկրորդ եռամսյակին՝ 6,6 գրամ, իսկ երրորդին՝ 9,6 գրամ: Միներալի հավելյալ պաշար կարելի է խոզի չալաղաջից, դդմի սերմերից եւ ձվից ստանալ:

Սելեն. հղիության ընթացքում այս միներալը քառապատկման կարիք է զգում: Թյունոսը, լոլիկը եւ բրոկոլին սելենի մեծ պաշարներ ունեն:

Կալցիում. եթե այս միներալի նկատմամբ կարիքները սննդակարգի միջոցով չբավարարեք, օրգանիզմը կսկսի ձեր ոսկերում առկա կալցիումի պաշարները սպառել: Այնպես որ, օրական հարկ է առնվազն երեք բաժին կաթնամթերքից օգտվել: Ընդ որում, մեկ բաժնի համարժեքը մեկ բաժակ կաթը կամ յոգուրտը, ինչպես նաեւ՝ 40 գրամ պաստերացված պանիրն են համարվում: Կալցիումի անհրաժեշտ պաշար կարելի է նաեւ տոֆուի եւ նարնջի հյութից, մուգ կանաչ տերեւներով աչքի ընկնող բանջարեղենի տեսակներից, բրոկոլիից, նշից, անչոուսներից եւ պահածոյացված սաղմոնից ձեռք բերել:

Երկաթ. հղիության ընթացքում օրգանիզմում շրջանառվող արյան ծավալների աճ է նկատվում, ինչի արդյունքում առաջին, երկրորդ եւ երրորդ եռամսյակների ընթացքում օրական, համապատասխանավար, 27, 34 եւ 38 մգ երկաթ կլանելու կարիք է առաջանում: Այդուհանդերձ, հարկավոր է հիշել, որ բուն կլանման գործընթացը բավականին դժվար է ընթանում: Երկաթի հարուստ պաշարներ կարմիր միսը, թռչնեղենի մուգ միսը, սաղմոնը, ձուն եւ վարսակի շիլան կարող են տրամադրել:

Օմեգա-3 ճարպաթթուներ. պտղի ուղեղի զարգացման համար նպաստավոր նշանակություն ունեցող այս ճարպաթթուները ձկնեղենի տարբեր տեսակներից, մասնավորապես՝ սաղմոնից, «թեթեւ» թյունոսից եւ սարդինաձկից կարելի է ստանալ: Սակայն հարկավոր է համոզվել, որ դրանք վստահելի եւ անվտանգ աղբյուրից են ձեռք բերվել, քանի որ փոքր քանակությամբ սնդիկ կարող են պարունակել: Նույն նկատառումներից ելնելով՝ միառժամանակ ձկան հում մսի օգտագործումից հրաժարվեք:

Ջուր. մեծ քանակությամբ ջուր ընդունեք եւ հիշյալ վիտամիններն ու միներալները սննդային հավելումների տեսքով կլանելու գաղափարից հրաժարվեք:

Հարցեր, պատասխաններ, մեկնաբանություններ